لاہور(آئی این پی) عوامی مسلم لیگ کے سر براہ شیخ رشید احمد نے کہا ہے کہ سی پیک منصوبے کی ضامن پاک فوج ہے لیکن نواز شریف کی کوئی گارنٹی نہیں ہے جبکہ آصف علی زرداری بھی شرفاکے کام نہیں آئیں گے۔ ہفتہ کو اپنے ایک انٹر ویو میں شیخ رشید احمد نے کہا کہ ہمارے ملک کے سربراہوں نے عوام کے سامنے امریکہ کو گالیاں نکال نکال کر ووٹوں کی بھر مار کر لی اور کرسیوں پر براجمان ہوگئے

جبکہ پردے کے پیچھے ان کے امریکہ کیساتھ تعلقات دوستانہ تھے۔انہوں نے کہا کہ ہمارے لیڈروں نے ہر قدم پر معصوم عوام کو دھوکہ دیا ہے اس ملک کو نیک اور سچی قیادت کی ضرورت ہے اور اگر ہمیں سچی قیادت چاہیے تو نظام دین لوہار کے نظام کو بدلنا ہوگا۔انہوں نے کہا کہ یہاں بچوں کے دودھ میں یوریا ملایا جاتا ہے،زہرہ بی بی جیسی کئی خواتین ہسپتالوں کے باہر عدم علاج کے باعث ایڑھیاں رگڑ رگڑ کر دم توڑ دیتی ہیں اور پھر بھی حکومت کہے کہ ہم مقبول ترین ہیں تو پھر یہی بات ان کیلئے کافی ہے کہ اناللہ وانا الیہ راجعون۔انہوں نے پانامہ کیس پر اظہار خیال کرتے ہوئے کہاکہ اگر پانامہ کا جنازہ نہیں اٹھتا تونواز شریف جیت کر بھی ہار چکے ہیں، شریف برادران کے پاس جو تجربہ ہے وہ محض کرپشن کی دولت چھپانے کیلئے استعمال کیا جارہا ہے لیکن 126دن کے دھرنے نے میاں صاحب کا اتنا نقصان نہیں کیاتھا جتنا سپریم کورٹ کی سماعت نے کچھ دنوں میں کر دیا ہے شیخ رشید کا سی پیک منصوبے کے حوالے سے تبصرہ کرتے ہوئے کہنا تھاکہ پاکستان سی پیک کے ذریعے 60ملکوں کو چین کا راستہ دینے جارہاہے جوکہ پاکستان کیلئے انتہائی مفید ہے جبکہ 2017 کا سال اس منصوبے کیلئے کافی اہمیت کا حامل ہے۔

موضوعات:سی پیک شیخ رشید نواز شریف