مانچسٹر(سی پی پی ) اسپیکر قومی اسمبلی اسد قیصر کے برطانیہ پہنچنے پر ہنگامہ آرائی ہوگئی، اسد قیصر کی ظہرانے میں شرکت سے معذرت پر کارکنان نے ان کے خلاف احتجاج اور نعرے بازی کی ۔تفصیلات کے مطابق اسپیکر قومی اسمبلی اسد قصر مانچسٹر ائیرپورٹ پہنچے تو عمران خان لورز کی جانب سے ظہرانے کی دعوت دی گئی۔ اسد قیصر نے خرابی صحت کا عذر پیش کرتے ہوئے پروگرام میں جانے سے معذرت کی، جس پر پی ٹی آئی کے بعض کارکنان نے ان کے خلاف نعرے بازی شروع کردی۔

احتجاج پر دوسرے گروپ کے کارکنان الجھ پڑے اور آپس میں گتھم گتھا ہوگئے۔ واقعے پر قونصل جنرل آف پاکستان عامر آفتاب نے افسوس کا اظہارِ کیا کہا واقعہ پاکستان کی جگ ہنسائی کا باعث بنا۔ دوسری جانب اسپیکر قومی اسمبلی اسد قیصر نے میڈیا سے گفتگو کرتے ہوئے کہا کہ سب کا احتساب میرٹ پر ہونا چاہیے،کسی کیخلاف انتقامی کارروائی نہیں ہونی چاہیے، پاکستان کواس وقت بہت سارے چیلنجز کا سامنا ہے۔ انہوں نے کہا شہبازشریف کو وزیراعظم کے مشورے سے پی اے سی کا چیئرمین بنایا گیا۔

موضوعات:سپیکر قومی اسمبلی