راولپنڈی(مانیٹرنگ ڈیسک)وزیراعظم عمران خان نے کہاہے کہ پاکستان کو اندرونی اور بیرونی چیلنجز کا سامنا ہے تاہم قوم کی حمایت سے ان چیلنجز پر کامیابی سے قابو پالیں گے۔پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق وزیراعظم عمران خان نے وفاقی وزراء اور مشیروں کے ہمراہ جی ایچ کیو کا دورہ کیا۔آئی ایس پی آر کے مطابق آرمی چیف جنرل قمر جاوید باجوہ نے وزیراعظم کا استقبال کیا،

انہیں گارڈ آف آنر بھی پیش کیا گیا جس کے بعد وزیراعظم نے یادگار شہداء پر پھولوں کی چادر چڑھائی اور انہیں خراج عقیدت پیش کیا۔وزیراعظم اور وزراء کو سیکیورٹی صورت حال، دہشت گردی کے خلاف پاک فوج کی کارروائیوں، کراچی آپریشن اور خوشحال بلوچستان پر تفصیلی بریفنگ دی گئی۔آئی ایس پی آر کے مطابق وزیراعظم عمران خان نے پاک فوج کی پیشہ ورانہ صلاحیتوں اور دہشت گردی کے خلاف پاک فوج کی قربانیوں کو سراہا۔وزیراعظم عمران خان کا جی ایچ کیو کا دورہ 8 گھنٹے طویل تھا جس نے سب کی توجہ حاصل کر لی۔ اس حوالے سے ماہرین کا کہنا ہے کہ اس دورے کے طویل ہونے کی وجہ موضوعات کے تنوع اورشرکا کی بھرپور دلچسپی ہے جس کی وجہ سے وزیراعظم عمران خان کے اس دورے کو غیر معمولی قرار دیا گیا۔ماہرین کے مطابق اتنا طویل اجلاس وزیراعظم اور ان کی ٹیم کی ایشوز کے حوالے سے سوجھ بوجھ، معاملات کو سمجھنے کی سنجیدہ کوشش کی وجہ سے ہوا ۔وزیراعظم نے کہا کہ پاکستان کو اندرونی اور بیرونی چینلجز کا سامنا ہے لیکن قوم کی حمایت سے ان چیلنجز پر کامیابی سے قابو پائیں گے۔انہوںنے کہاکہ حکومت فوج کو اپنی صلاحیتیں بڑھانے کے لیے تمام وسائل مہیا کرے گی، پاکستان کی منزل آگے بڑھنا ہے اور انشاء اللہ ہم مثبت سوچ اور دوسری اقوام سے اچھے مراسم کے ساتھ آگے بڑھیں گے۔آرمی چیف جنرل قمر جاوید باجوہ نے جی ایچ کیو آمد اور فوج کی صلاحیتوں پر اعتماد کرنے پر وزیراعظم عمران خان کا شکریہ ادا کیا۔جنرل قمر جاوید باجوہ نے کہا کہ پاک فوج مادر وطن کی حفاظت کے لیے قوم کی توقعات پر پورا اترے گی۔انہوںنے کہاکہ ہر قیمت اور قربانیوں سے مادر وطن کی حفاظت کی جائے گی۔

موضوعات:جی ایچ کیو دورہ چیف جنرل قمر جاوید باجوہ وزیراعظم عمران خان