اسلام آباد (مانیٹرنگ ڈیسک) عوامی مسلم لیگ کے رہنما شیخ رشید احمد کی پیش گوئی سچ ثابت ہو گئی، ایک نجی ٹی وی چینل سے گفتگو کرتے ہوئے شیخ رشید احمد نے کہا کہ آج اپوزیشن کچھ اور ہے، کل کچھ اور ہو گی اور پرسوں کچھ اور ہو گی، حالات بدلے ہوئے ہوں گے۔ اس موقع پر شیخ رشید نے کہا کہ میں تو پہلے ہی کہہ چکا تھا کہ ایک میان میں دو تلواریں نہیں آ سکتیں۔

انہوں نے کہا کہ میری آج اسمبلی میں آصف علی زرداری سے گپ شپ ہوئی تو انہوں نے کہا کہ جو آپ ٹی وی میں کہہ رہے ہیں ویسا ہی ہو گا۔ شیخ رشید احمد نے گفتگو کرتے ہوئے کہا کہ میرے خیال میں وہ وہ لیڈر آف اپوزیشن نہیں بدلیں گے۔ ن لیگ اپنا امیدوار لائے گی اور پیپلز پارٹی اپنا امیدوار سامنے لائے گی۔ واضح رہے کہ عوامی مسلم لیگ کے سربراہ شیخ رشید کی پیش گوئی سچ ثابت ہو گئی ہے اور سپیکر کے انتخاب میں تحریک انصاف کے امیدوار کی جیت کے ساتھ ہی اپوزیشن اتحاد بھی منتشر ہو گیا۔ ٹی وی رپورٹ کے مطابق تحریک انصاف کے اسد قیصر قومی اسمبلی کے سپیکر منتخب ہوئے تو لیگی کارکنان نے ایوان میں احتجاج شروع کر دیا لیکن اس موقع پر سابق اپوزیشن لیڈر خورشید شاہ سمیت پیپلز پارٹی کے تمام اراکین احتجاج سے الگ تھلگ رہے۔ مسلم لیگ (ن) کے احتجاج کی وجہ سے نو منتخب سپیکر قومی اسمبلی اسد قیصر نے اجلاس بھی 15 منٹ کے لیے ملتوی کر دیا۔ واضح رہے کہ نومنتخب سپیکر اسد قیصر جب حلف اٹھانے لگے تو ن لیگ کی طرف سے احتجاج کیا گیا، سابق ڈپٹی سپیکر مرتضی جاوید عباسی نے سب سے پہلے تقریر کرنے کی کوشش کی اس کے علاوہ مختلف لیگی ارکان نے نواز شریف کے پوسٹر نکال لیے اور یہ پوسٹ لے کر مختلف مقامات پر کھڑے ہو گئے، کچھ ارکان نے ڈائس کے قریب بھی احتجاج کیا، جب ن لیگ کے اراکین نے احتجاج کا آغاز کیا تو اس موقع پر پیپلز پارٹی کے ارکان ان سے الگ تھلک رہے اور وہ ان کے احتجاج میں شریک نہیں ہوئے۔

موضوعات:ا شیخ رشید احمد