چنگ ڈاؤ(آئی این پی) صدر مملکت ممنون حسین نے کہا ہے کہ ایران کے سپریم لیڈر کا کشمیریوں کی حمایت میں بیان خوش آئند ہے ‘ پاکستان اور ایران کے درمیان گہرے برادرانہ تعلقات ہیں۔ ہفتہ کو صدر ممنون حسین اور ایران کے صدر ڈاکٹر حسن روحانی کی ملاقات ہوئی۔ ملاقات میں شنگھائی تنظیم سربراہ اجلاس کے موقع پر ہوئی۔ ملاقات میں دو طرفہ تعلقات ‘ خطے اور عالمی صورتحال پر تبادلہ خیال کیا گیا۔

صدر مملکت نے کہا کہ پاکستان اور ایران کے درمیان گہرے دوستانہ اور برادرانہ تعلقات ہیں۔ دونوں ممالک باہمی دلچسپی کے امور پر ایک دوسرے کی حمایت کرتے ہیں ۔ ایران کے سپریم لیڈر کا کشمیریوں کی حمایت میں بیان خوش آئند ہے۔ صدر ممنون حسین نے کہا کہ گوادر ا ور چابہار بندرگاہوں میں رابطے سے تعلقات مزید مضبوط ہوں گے۔ دونوں رہنماؤں نے دو طرفہ معاشی تعلقات بڑھانے پر اتفاق کیا۔

موضوعات:ممنون حسین