اسلام آباد(سی پی پی )سپریم کورٹ نے شاہد خاقان عباسی کو بحیثیت سی ای او ایئربلیو 12 مئی کو کراچی میں طلب کر لیا۔پائلٹس کی مبینہ جعلی ڈگریوں سے متعلق کیس کی سپریم کورٹ میں سماعت ہوئی۔ چیف جسٹس نے استفسار کیا ایئر بلیو کے سربراہ کون ہیں ؟ ابھی تک ڈیٹا کیوں نہیں دیا ؟ ایئر بلیو کے چیف ایگزیکٹو آکر بتائیں کتنے افراد کی جعلی ڈگریاں ہیں۔ جس پر حکام نے جواب دیا وزیراعظم شاہدخاقان عباسی ایئربلیو کے سی ای او ہیں۔

چیف جسٹس میاں ثاقب نثار نے استفسار کیا پاکستان میں کتنی ایئر لائنز کام کر رہی ہیں ؟ جس پر ڈپٹی اٹارنی جنرل نے جواب دیا پی آئی اے، شاہین، ایئربلیو اور سیرین ایئرلائنز کام کر رہی ہیں، پی آئی اے کے 108 افراد کے ڈیٹا کی سول ایوی ایشن نے تصدیق کر دی، 117 افراد کے ڈیٹا کی تصدیق ہونا باقی ہے۔ چیف جسٹس نے پوچھا پی آئی اے کے کتنے اسٹاف کی تصدیق کرنی تھی۔ ڈپٹی اٹارنی جنرل نے بتایا 1978 افراد کی ڈگریوں کی تصدیق ہونی ہے۔

موضوعات:شاہد خاقان عباسی