اسلام آباد(مانیٹرنگ ڈیسک)افغانستان کی جانب سے پاک فوج کی افغانستان میں گھس کر کارروائی پر پاکستانی دفتر خارجہ کا ردعمل بھی سامنے آگیا۔ تفصیلات کے مطابق افغانستان کی جانب سے پاک فوج کی افغانستان میں گھس کر کارروائی کے الزامات کے بعد پاکستانی دفتر خارجہ کی جانب سے ردعمل بھی سامنے آگیا ہے اور ترجمان دفتر خارجہ ڈاکٹر محمد فیصل نے افغانستان کے الزامات کو

بے بنیاد اور من گھڑت قرار دیتے ہوئے کہا کہافغان حکومت کو الزام تراشیوں سے باز رہنا چاہیے جب کہ افغانستان سے دہشت گرد حملوں میں بھاری جانی ومالی نقصان ہورہا ہے کیوں کہ افغانستان کے سرحدی علاقوں میں دہشت گردوں کی محفوظ پناہ گاہیں ہیں۔ سرحدی علاقوں سے دہشت گرد پاکستانی عوام اور سکیورٹی فورسز کونشانہ بناتے ہیں لہذا افغان حکومت سرحدی علاقوں میں انسداد دہشت گردی کے لیے مؤثرکارروائیاں کرے کیوں کہ دونوں ملک دہشت گردی کے خلاف ملکر کام کریں گے تو فائدہ ہوگا اور دہشت گردی کے خاتمے سے دونوں ملکوں کو ترقی و خوشحالی میسرآئے گی۔ترجمان کے مطابق باجوڑ ایجنسی میں دہشت گردوں کے خلاف آپریشن ہورہا ہے اور انسداد دہشت گردی کی کارروائیوں سے متعلق افغان حکام کو باقاعدگی سے آگاہ رکھا جاتا ہے جب کہ پاکستان نے باجوڑ آپریشن سے متعلق بھی افغان حکام کو ضروری معلومات فراہم کردی ہیں۔واضح رہے کہ افغان صدر اشرف غنی کی دعوت پر آج وزیراعظم پاکستان شاہد خاقان عباسی افغانستان کا دورہ کر رہے ہیں۔ اس سے قبل بھی اہم پاکستانی شخصیات کے افغانستان کے دورے سے قبل افغان حکومت اور سٹیبلشمنٹ کی جانب سے اسی قسم کے الزام لگا کر پاکستان کی افغانستان کے ساتھ دوستانہ تعلقات کی کوششوں کو نقصان پہنچایا جاتا رہا ہے۔اس سے قبل افغانستان میں ہوئے بدترین دہشتگرد حملوں کا الزام بھی افغان حکومت اور انتظامیہ کی جانب سے بغیر کسی تحقیق کے پاکستان پر عائد کیا جاتا رہا ہے جس سے دونوں ممالک کے درمیان تعلقات میں سرد مہری آتی رہی ہے۔

موضوعات:افغانستان افغانستان سرجیکل سٹرائیک پاک فوج ترجمان دفتر خارجہ ڈاکٹر محمد فیصل