نیشنل پیپلز کانگریس چین کا سب سے بڑا قانون ساز ادارہ ہے‘ اس کے کل ارکان کی تعداد دو ہزار نو سو ہوتی ہے اور یہ لوگ پورے ملک سے الیکٹ ہوتے ہیں‘ چینی حکومت کو 2013ء میں پتہ چلا کانگریس کے پینتالیس ارکان ووٹ خرید کر ایوان میں پہنچے ہیں‘ حکومت نے تحقیقات شروع کیں‘ تحقیقات میں تین سال لگ گئے‘ 2016ء میں ثابت ہو گیا ۔

ان ارکان کے خلاف الزامات درست ہیں‘ حکومت نے نہ صرف ان پینتالیس ارکان کو کانگریس سے نکال دیا بلکہ ان پر پوری زندگی کیلئے سرکاری عہدوں اور فیصلہ ساز ایوانوں میں شرکت پر پابندی بھی لگا دی‘ ان پینتالیس ارکان میں چین کی ایک ارب پتی شخصیت بھی شامل تھی‘ آپ اس مثال کو ذہن میں رکھ کر میاں نواز شریف کی آج کی یہ پیش کش ملاحظہ کیجئے، یہ بہت اچھی پیش کش ہے‘ اگر ملک کی تمام بڑی سیاسی جماعتیں واقعی ہارس ٹریڈنگ ختم کرنا چاہتی ہیں تو پھر انہیں یہ کمیشن بھی بنانا چاہیے‘ ہارس ٹریڈنگ کے خلاف نیا اور مضبوط قانون بھی تیار کرنا چاہیے اور جو ارکان اس مکروہ کھیل میں ملوث ہوں انہیں پوری زندگی کیلئے سیاست سے بین بھی کر دینا چاہیے‘ اگر آپ یہ نہیں کرتے تو پھر ثابت ہو جائے گا آپ لوگ صرف مگرمچھ کے آنسو بہا رہے ہیں‘ آپ سسٹم کو کلین نہیں کرنا چاہتے اور آپ بھی اتنے ہی مجرم ہیں جتنے اس کاروبار میں شریک لوگ گناہ گار ہیں‘ ہم آج کے موضوع کی طرف آتے ہیں، میاں نواز شریف نے پیپلز پارٹی کے رضا ربانی کو چیئرمین بنانے کا عندیہ دے کر ایک زبردست کارڈ کھیلا لیکن زرداری صاحب نے انکار کر دیا‘ کیوں؟ پاکستان تحریک انصاف نے سینٹ میں پیپلز پارٹی اور ن لیگ دونوں سے اتحاد سے انکار کر دیا‘ یہ آزاد امیدوار کو ووٹ دے گی‘ یہ آزاد امیدوار کیوں؟ اور کیا پاکستان مسلم لیگ ن کے پاس چیئرمین کیلئے ووٹ پورے نہیں ہو رہے؟‘ یہ تمام نقطے ہمارے آج کے پروگرام کا حصہ ہوں گے‘ ہمارے ساتھ رہیے گا۔

موضوعات:جاوید چودھری کاتجزیہ