اسلام آبادلاہور(این این آئی،سی پی پی)نیب ریفرنسز کی سماعت کے دوران سابق وزیر اعظم محمد نواز شریف کے بینک اکاؤنٹ سے مریم نواز سمیت دیگر افراد کو منتقل کی گئی رقوم کی تفصیلات احتساب عدالت میں پیش کردی گئیں۔منگل کو احتساب عدالت کے جج محمد بشیر نے سابق وزیر اعظم نواز شریف ٗان کی بیٹی مریم نواز اور داماد کیپٹن ریٹائرڈ محمد صفدر کیخلاف ریفرنسز کی سماعت کی۔ عدالت کی جانب سے استثنیٰ ملنے کے باعث نواز

شریف کی جگہ ان کے نمائندے ظافر خان ترین جبکہ مریم نواز کے نمائندے جہانگیر جدون ایڈووکیٹ اور کیپٹن (ر) صفدر خود عدالت میں پیش ہوئے۔سماعت کے دوران کیپٹن ریٹائرڈ صفدر نے بھی حاضری سے استثنیٰ کی درخواست دائرکی، درخواست میں موقف اختیار کیا گیا کہ کیپٹن ریٹائرڈ صفدر کو 15 روز کیلئے حاضری سے استثنیٰ دیا جائے ٗ ان کی غیر حاضری میں فیصل عرفان ایڈووکیٹ پیش ہوں گے۔سماعت کے دوران استغاثہ کے گواہ کی جانب سے نواز شریف کے بینک اکاؤنٹ سے مریم صفدرسمیت دیگر افراد کو جاری چیکس کی تفصیلات پیش کردیں، جس کے مطابق نوازشریف کے اکاؤنٹ سے مریم صفدرکو 13 جون 2015 کو12 ملین جبکہ 15 نومبر 2015 کو 28.8 ملین، 14 اگست 2016 کو 19.5 ملین روپے کا چیک دیا گیا۔دریں اثنا سابق وزیراعظم نواز شریف لاہور سے لندن کے لیے روانہ ہوگئے، مریم نواز بھی ان کے ہمراہ ہیں۔سابق وزیراعظم غیر ملکی ایئرلائن کی پرواز 629 سے براستہ دوحا،لندن کے لیے روانہ ہوئے۔ایئرپورٹ پرلیگی رہنما اشتیاق لون ودیگرنے نوازشریف کورخصت کیا۔سابق وزیر اعظم نوازشریف 5 روزہ دورے پر لندن گئے ہیں جہاں وہ زیرعلاج اپنی اہلیہ کلثوم نواز کی تیمارداری کریں گے۔میاں نواز شریف اپنے صاحبزادوں حسن نواز اور حسین نواز سے ملاقاتیں بھی کریں گے۔واضح رہے کہ گزشتہ روزاحتساب عدالت نے نوازشریف کی درخواست منظورکرکے ایک ہفتہ کی حاضری سے استشنی دے دیا تھا جب کہ عدالت نےمریم نواز کو 15 نومبر سے 15 دسمبر تک کا استثنی دے رکھا ہے۔

موضوعات:مریم نواز نوازشریف نیب ریفرنسز