نئی دہلی (آئی این پی ) امریکی وزیر خارجہ ریکس ٹلرسن نے کہا ہے کہ بھارت امریکا کا قدرتی دوست ہے، اس کی خطے میں بطور لیڈر حمایت کرتے ہیں،بھارتی فوج کو جدید ٹیکنالوجی سے آراستہ کیا جائے گا۔امریکی وزیر خارجہ دورہ بھارت پر نئی دلی پہنچے جہاں انہوں نے بھارتی ہم منصب سشما سوراج سے ملاقات کی۔

اس موقع پر دونوں ممالک کے وزرائے خارجہ کے درمیان دفاعی تعاون، خطے کی سلامتی اور تعاون سمیت دیگر معاملات پر بات چیت کی گئی۔مشترکہ پریس کانفرنس کے دوران امریکی وزیر خارجہ نے کہا بھارت امریکا کا قدرتی دوست ہے جس کی خطے میں اہمیت ہے اور امریکا بھارت کی خطے میں بطور لیڈر حمایت کرتا ہے۔بھارتی میڈیا کے مطابق امریکی وزیر خارجہ نے یقین دہانی کرائی کہ بھارتی فوج کو جدید ٹیکنالوجی سے آراستہ کیا جائے گا۔ریکس ٹلرسن نے کہا کہ وہ بھارت کے ساتھ لڑاکا طیارے ایف 16 اور ایف 18 پر مذاکرات کے لئے تیار ہیں۔اس موقع پر بھارتی وزیر خارجہ سشما سوراج نے ایک مرتبہ پھر پاکستان پر الزام عائد کرتے ہوئے کہا کہ بھارت اور امریکا نے اتفاق کیا ہے کہ پاکستان کو اپنے ملک میں موجود دہشت گردوں کی محفوظ پناہ گاہوں کو ختم کرنا ہوگا۔خیال رہے کہ امریکی وزیر خارجہ دورہ بھارت کے دورانزیراعظم نریندر مودی سے بھی ملاقات کریں گے۔

موضوعات:امریکی وزیر خارجہ