نئی دہلی( آن لائن )بھارت میں ریاست اترکھنڈ کے بارش سے متاثرہ علاقوں کے عوام کے لیے امدادی سامان لے کر جانے والا ہیلی کاپٹر گر کر تباہ ہو گیا۔ہندوستان ٹائمز کی رپورٹ کے مطابق ہیلی کاپٹر گرنے کا واقعہ اترکھنڈ کے ضلع اترکاشی میں پیش آیا جس میں 3 افراد سوار تھے۔نیشنل ڈیزاسٹر ریسپانس فورس (ایس ڈی آر ایف) کی میڈیا انچارج پروین الوک نے کہا کہ ہیلی کاپٹر ہیریٹیج ایوی ایشن کی ملکیت تھا جسے پائلٹ راج پال اڑا رہے تھے، ان کے ساتھ معاون پائلٹ کپتان لال موجود تھے جبکہ ریسکیو آپریشنز میں شامل مقامی شخص رَمیش ساور بھی ہیلی کاپٹر پر سوار تھا۔ریاستی ڈیزاسٹر منیجمنٹ ڈپارٹمنٹ کے سیکریٹری

انچارج ایس اے موروگیسان نے ہیلی کاپٹر گر کر تباہ ہونے کی تصدیق کی، تاہم ان کا کہنا تھا کہ حادثے میں ہونے والے جانی نقصان کی ابھی تصدیق نہیں کی جاسکتی۔ریاستی عہدیدار نے نام ظاہر نہ کرنے کی شرط پر بتایا کہ ریاستی سول ایوی ایشن محکمے کے ہیلی کاپٹر نے امداد سامان لے کر دہرادون سے اترکاشی کے گاؤں آراکوٹ کے لیے اڑان بھری تھی۔وہاں امداد سامان فراہم کرنے کے بعد ہیلی کاپٹر دوسرے متاثرہ گاؤں مولدی جارہا تھا تاہم راستے میں وہ بجلی کی تاروں میں پھنسنے کے بعد گر کر تباہ ہو گیا۔واضح رہے کہ حالیہ بارشوں میں اترکاشی میں 15 افراد ہلاک ہوئے تھے اور بڑے پیمانے پر مالی نقصان ہوا تھا۔

موضوعات:بھارتی ہیلی کاپٹر تباہ