نیویارک/کابل(این این آئی )ریڈ کراس کی عالمی کمیٹی نے کہاہے کہ طالبان کا ان پر اور عالمی ادارہ صحت (ڈبلیو ایچ او) پر پابندی کے اعلان کے بعد انہوں نے افغانستان میں اپنی تمام سرگرمیاں معطل کردی ہیں ،میڈیارپورٹس کے مطابق آئی سی آر سی کے ترجمان روبن ووڈو کا کہنا تھا کہ ان کے ادارے نے افغانستان میں اپنی تمام سرگرمیاں روک دی ہیں۔ان کا کہنا تھا کہ ہم اس اعلان پر عمل کرتے ہوئے سیکیورٹی کی گارنٹی ختم ہونے پر ملک سے اپنی تمام سرگرمیاں معطل کر رہے ہیں۔

جبکہ طالبان نے کہا کہ آئی سی آر سی نے ان کے ساتھ کیے گئے معاہدے کی پاسداری نہیں کی ہے۔تقریباً آدھے افغانستان کا کنٹرول رکھنے والے طالبان نے ڈبلیو ایچ او پر بھی ویکسینیشن مہم کے دوران مشتبہ نقل و حرکت کا الزام لگایاہے۔طالبان کے بیان میں کہا گیا کہ ان وجوہات پر طالبان نے فیصلہ کیا ہے کہ ان دونوں اداروں پر ملک بھر میں پابندی عائد رہے گی۔انہوں نے واضح کیا کہ پابندی کے دوران طالبان ان اداروں کے صحت رضاکاروں کی سیکیورٹی کے ذمہ دار نہیں ہوں گے۔

موضوعات:طالبان