قانونی چارہ جوئی کا خطرہ، امریکا سے فلسطینی امداد بند کرنے کی درخواست

  بدھ‬‮ 23 جنوری‬‮ 2019  |  11:30
بیت لحم(این این آئی)تنظیم آزادی فلسطین پی ایل او کے سیکرٹری صائب عریقات نے بتایاہے کہ حکومت نے امریکی انتظامیہ کو ایک مکتوب ارسال کیا ہے جس میں امریکا سے فلسطینی اتھارٹی کی سیکیورٹی شعبے سمیت تمام امداد بند کرنے کی درخواست کی گئی ہے۔غیرملکی خبررساں ادارے کے مطابق پی ایل او کی طرف سے یہ درخواست اس لیے دی گئی ہے تاکہ رواں ماہ کے آخر میںفلسطینی اتھارٹی کے خلاف امریکا میں عدالتی کارروائی کی کوشش ناکام بنائی جاسکے۔صائب عریقات نے کہا کہ ہاں میں امریکا کو لکھے گئے مکتوب کی تصدیق کرتا ہوں۔یہ مکتوب صدر محمود عباس کی ہدایت پر امریکا کو لکھا گیا ہے۔ ہمیں خدشہ ہے کہ امریکا میں ہمارے خلاف کوئی قانونی چارہ جوئی شروع کی جاسکتی ہے۔ امریکا کے انسداد دہشت گردی کے نئے قانون اٹکا کے تحت فلسطینی اتھارٹی کے خلاف قانونی کارروائی عمل میں لائی جاسکتی ہے۔صائب عریقات کا کہنا تھا کہ امریکا نے حال ہی میں انسداد دہشت گردی کے لیے ایک نیا قانون منظور کیا ہے جسے جلد ہی نافذ کیا جائے گا۔ فلسطینی اتھارٹی کو دی جانے والی امداد امریکا میں بعض حلقوں کو فلسطینی اتھارٹی کے خلاف قانونی کارروائی کا موقع فراہم کرسکتی ہیں۔امریکا کو بھیجے گئے فلسطینی حکومت کے مکتوب پر فلسطینی وزیراعظم رامی الحمد اللہ کے دستخط ثبت ہیں اور یہ مکتوب امریکی وزیر خارجہ مائیک پومپیو کو بھیجا گیا ہے۔ایک سوال کے جواب میں صائب عریقات نے کہا کہ امریکا کی طرف سے فلسطینی امداد بند ہونے سے سیکیورٹی اداروں کی کارکردگی پرکوئی اثر نہیں پڑے گا۔

موضوعات:

loading...