اسلام آباد(مانیٹرنگ ڈیسک) اب کسی کیلئے بھی چین کو روکنا ممکن نہیں، امریکہ میں تعینات چینی سفیر کا انڈوپیسفک خطے میں چین کے خلاف بننے والے اتحاد پر برہمی کا اظہار، امریکہ بھارت گٹھ جوڑ پر تشویش کا اظہار۔ تفصیلات کے مطابق امریکہ بھارت گٹھ جوڑ چین

کے خلاف اب کھل کر سامنے آچکا ہے اورچین بھی اس سے آگاہ ہے اور اس کے توڑ کیلئے پوری طرح تیار ہے ۔ بھارتی اخبار ٹائمز آف انڈیا کے مطابق امریکہ میں تعینات چینی سفیر نے انڈوپیسفک خطے میں چین کے خلاف بننے والے اتحاد پر برہمی کا اظہار کرتے ہوئے کہا کہ اب کسی کیلئے بھی چین کو روکنا ممکن نہیں ہے۔ سفیر کوئی تیان کائی سے امریکہ کے بھارت کی جانب بڑھتے ہوئے رجحان اور اسے ہائی ٹیک ملٹری ساز وسامان فروخت کرنے کے متعلق سوال کیا گیا تھا، جبکہ امریکی وزیر خارجہ ریکس ٹلر سن کی پالیسی تقریر اور جاپان ، آسٹریلیا، بھارت اور امریکہ کے چار فریقی مذاکرات کے بارے میں بھی ان سے پوچھا گیا تھا۔یاد رہے کہ دفاعی تجزیہ کار امریکہ کی جانب سے بھارت کو جدید ترین ہتھیار بیچنے کی پالیسی کو دراصل چین کا راستہ روکنے کی پالیسی قرار دے رہے ہیں۔ اگلے ماہ امریکی صدر ڈونلڈ ٹرمپ چین کا دورہ بھی کرنے والے ہیں، اور ایسے موقع پر چین کی جانب سے ایک سخت بیان کا سامنے آنا امریکہ کیلئے واضح پیغام ہے۔

موضوعات:امریکہ بھارت چین