دمشق/ماسکو(آئی این پی)روس کی دو جنگی آبدوزوں نے بحیرہ روم سے شام کے شہر تدمرمیں داعش کے ٹھکانے پر کروز میزائل حملہ کیا ہے۔روس کی سرکاری خبر رساں ایجنسی نے ماسکو وزارت دفاع کے حوالے سے جاری کردہ ایک بیان میں بتایا ہے کہ دو جنگی آبدوزوں کی مدد سے بدھ کو بحیرہ روم سے ایک کروز میزائل داغا گیا۔ اس میزائل حملے میں تدمر شہرکے قریب داعش کے ٹھکانے اور ایک اسلحہ ڈپو کو نشانہ بنایا گیا۔

وزارت دفاع کے بیان میں کہا گیا ہے کہ کروز میزائل حملے سے قبل روسی حکام نے امریکا، ترکی اور اسرائیل کو مطلع کیا تھا۔روسی فوج کی طرف سے جاری کردہ ایک بیان میں بھی کہا گیا ہے کہ داعش پر سمندر سے داغے گئے کروز میزائل سے قبل مخصوص فریقین کو مطلع کیا گیا تھا۔ بیان میں کہا گیا ہے کہ کروز میزائل سے الرقہ سے فرار ہونے والے داعشی جنگجوں کو نشانہ بنایا گیا۔ شامی صدر بشار الاسد کے حلیف ملک روس کی فضائیہ شام میں کارروائیوں میں مصروف ہے۔

موضوعات:جنگی آبدوز شام